Xa están instaladas todas as tubaxes da rede e procederase á pavimentación este mes
A obra de ampliación da rede de abastecemento en Bexe, coa que se dotará deste servizo esencial a 35 vivendas deste lugar de Seixo, está preto de finalizar. Segundo explicou o concelleiro de Medio Rural, Pablo Novas, xa están practicamente colocadas todas as tubaxes que conforman a nova rede.
“Agora, nos próximos días, realizarase a proba de presión e despois iniciarase a reposición do pavimento. Ademais, executarase unha cuneta nun dos viarios, que estaba moi deteriorada e que por iso é necesario facela de novo”, explicou o edil.
Novas lembra aos veciños que se beneficiarán da nova rede que desde xa poden solicitar a conexión ao abastecemento, a través do Rexistro do Concello.
“Estamos moi satisfeitos de levar a cabo esta obra, porque é unha actuación moi importante que os veciños levaban tempo demandando, xa que sobre todo no verán tiñan problemas cos seus abastecementos privados. Desta forma, pomos fin á problemática”, acabou Novas.
O investimento realizado na actuación é de 126.000 euros, con cargo ao Remanente de Tesourería.
